எந்தக் கட்சியில் நீ இருந்தாலும்
இனத்தை மறந்திடாதே ! - தமிழா !
இனத்தை மறந்திடாதே ! - உன்
சொந்தக் குடும்பம் தனைப்பல கருத்தால்
சுட்டுப் பொசுக்கிடாதே ! - தமிழா
சுட்டுப் பொசுக்கி டாதே !
எந்தத் திசையில் நீ இருந்தாலும்
ஏற்றந் துறந்திடாதே ! - தமிழின்
எழிலைத் துறந்திடாதே ! - பழங்
கந்தலை யுடுத்துக் கஞ்சியை யருந்தினும்
கனிவை யிழந்திடாதே ! - இனக்
கனிவை யழித்தி டாதே !
எந்த நிலத்தினில் நீ இருந்தாலும்
இயல்பை மாற்றிடாதே ! - இனத்தின்
இணைப்பை யறுத்திடாதே ! - உன்
முந்தையர் வாழ்ந்த முதுதமிழ் நாட்டின்
மொழியை மறந்திடாதே ! - உணர்வை
மூளி யாக்கிடாதே !
எந்தப் படையினில் நீ இருந்தாலும்
இனத்தை எதிர்த்திடாதே ! - தமிழா,
எதிரிக் குழைத்திடாதே ! - உன்
சொந்தத் தமையனைத் தம்பியைக் கொல்லவே
சூழ்ச்சி நினைந்திடாதே ! - பகைவன்
சோற்றில் நனைந்திடாதே !
என்றும் தமிழாய் வாழும்,
பாவலரேறு பெருஞ்சித்திரனார்
கனிச்சாறு - தொகுதி 2.
தென்மொழி பதிப்பகம்
மேடவாக்கம், சென்னை - 600 100
-----------------------------------------------------
94444 40449
0 comments:
Post a Comment